LAOAG CITY – Kinumpirmaran ni Mayor Remigo Medrano iti ili ti Sarrat a pimmusayen ni IN-C235, lakay nga agtawen ti 92, itay laeng parbangon.
Ni IN-C235 ket residente iti Barangay 17 iti nadakamat nga ili, nairekord a positibo iti covid-19 idi Nobyembre 27 no sadinno ket adda ti sintomas na, awan ti travel history na ken saan a nadeterminar no siasinno ti exposure na.
Segun kenni Medrano, adda ti coronary problem ti pasyente isut gapo na a naitaray iti ospital ken kas protocol iti ospital ket dimmalan iti swab test ken ditoy a naduktalan a positibo iti covid-19.
Inbatad na a saan a na-cremate ti bangkay ni IN-C235 isut gapo na a naikali daytoy ngem inpasigurado na a nasurot ti requirement ti IATF mainaig iti kauneg ti pakaidulin daytoy itay bigat iti paset ti public cemetery iti South of the River it nasao nga ili.
Inpasigurado met ni Mayor Medrano a dagiti nangitabon kenni IN-C235 ket nagusar met ti PPE ken nasurot amin a pagalagadan.
Mainaig iti daytoy, kuna ni Mayor Medrano a ti pamilya ni IN-C235 a ni IN-C358 ken IN-C359 ket agdama a naka-isolate ken awan ti sintomas dagitoy.
Kuna pay a ni IN-C386, agtawen ti 46 nga apoko ni IN-C235 ket agdama metten a naka-isolate iti Municipal Isolation Unit.
Kabayatanna, inadmitir ni Medrano a dakkel a karit kadakuada iti agdama ti panagpasken ni IN-C286 iti namin-dua a daras partikular idi Nobyembre 16 ken Nobyembre 26.
Gapo iti daytoy, immapela ti mayor iti kailyan na a masapol a sumurot dagitoy kadagiti maipatpatugpal nga health protocol.
Ni IN-C235 ket su ti maikadwa a pasyente iti ili ti Sarat a pimmusay gapo iti covid-19.
