LAOAG CITY – Inpetteng ni Barangay Chairman Erlinda Foster iti Brgy. 57 Pila ditoy siudad ti Laoag a saan pay a pulos nagturong ti Locally Stranded Individual a nagpositibo iti COVID-19 wenno ni IN-C50.
Kuna na a nagdiretso nga insegida iti quarantine facility ken saan na pay a nalpas ti naipaay nga aldaw a panag quarantine na idi rimwar ti resulta ti test a positibo iti nasao a virus.
Segun kenni Foster, kalpasan a naamuan da a nagpositibo iti COVID-19 ni IN-C50 ket dagus a nagtignay na para iti pannakaiquarantine dagiti kabagyan na gapu ta ammo da a napan kinita dagiti kabagyan ni IN-C50 iti pasilidad.
Nagpanawagan ni Foster kadagiti kabarangayan na a saan da pay laeng a ruwar iti pagtaengan da tapno maliklikan ti nakarkaro a panagwaras ti COVID-19.
Sidadaan da nga isuda nga opisyal ti barangay ti mapan gumatang kadagiti kasapulan dagiti maseknan.
Innayon ni Foster a nasuroken a maysa a lawas ni IN-C50 sipud idi simmangpet ditoy probinsya ken naidiretso iti quarantine facility.
