LAOAG CITY – Kinumpirmaran ni Brgy. Chairman Wenceslao Patricio iti Brgy. 58-Casili ditoy siudad ti Laoag a pimmusayen ti kabarangayanda a ni IN-C5140, babai, agtawen ti 70.
Segun kenkuana, ti ipupusay ti pasyente ket mismo nga inpakaammo ti City Health Office.
Gapu iti daytoy, kuna na a dagus a naipatungpal ti pannakaiyimplementar ti lockdown iti pagtaengan ti maseknan a pamilya ti pimmusay ken masurot ti mandatory swab test.
Inbatad ni Patrico a dati a nagserbi kas Barangay Nutrition Scholar (BNS) ni IN-C5140 iti sumagmamano a tawen ngem nagikkat daytoy gapu iti kinabaketna.
Kuna na a sipod idi ket sagpaminsan laengen a rumrummuar iti pagtaengan ti pasyente.
Kunana nga iti kallabes ket napan iti ospital ditoy ti pasyente tapno agpa-check up ngem naiyakar iti Mariano Marcos Memorial Hospital and Medical Center iti Siudad ti Batac.
Inlawlawagna a dimmalan iti swab test ni IN-C5140 ket positibo ti resulta daytoy.
Inbagana nga adda immunan a sakit a sagsagabaen ni IN-C5140 partikular ti high blood ken panagkapsot iti bagbagi.
Kabayatanna, inbatad ni Patricio a saanna pay a masinunuo no na-cremate wenno naipunpon ti bangkay ni IN-C5140.
