LAOAG CITY – Kinumpirmaran ni Mayor Alfredo Valdez iti ili ti San Nicolas a pimmusayen ni IN-C849, agtawen ti 42, maysa a tricycle driver ken residente iti Barangay Sta. Monica iti nadakamat nga ili.
Nupay kasta, inlawlawag ni Valdez a saan a ti covid-19 ti kangrunaan a rason ti ipupusay ni IN-C849 no diket na-stroke daytoy.
Segun kenni Valdez, mabalin nga adda ti kontribusyon ti pannakaapektar iti covid-19 iti pannaka-stroke ti nasao a pasyente.
Inlawlawag ti mayor nga ummuna a na-stroke ti pasyente ket kas protocol iti ospital ket dimmalan iti swab test ken ditoy a naduktalan a nagpositibo iti covid-19.
Innayon na nga awan met ti naakaaran ni IN-C849 a miembro ti pamilya na.
Mainaig iti daytoy, dagus met laeng a naitabon ti pasyente kas panangsurot iti protocol a dagiti nagpositibo iti covid-19 a pumusay.
Kabayatanna, inpasigurado met ti mayor ti tulong ti lokal a gobierno ti ili ti San Nicolas iti pamilya ti pasyente.
