LAOAG CITY – Pimmusay idi rabii ni IN-C859 a nagpositibo ti covid-19 idi Marso 14 ita a tawen iti ciudad ti Batac.
Iti official statement nga inparuk-at ti opisina ni Mayor Albert Chua iti ciudad ti Batac, inbaga na a ti pimmusay a biktima ket agtawen ti 61, babai, APOR (government employee) ken residente iti Barangay 17, Tabug iti ciudad.
Naamoan a na-cremate ti bangkay ti biktima idiay ciudad ti Vigan itay bigat.
Indanun ti mayor ti panangikarkararag da iti pamilya ni IN-C859, kasta met dagiti amin a naapektaran ti virus, karaman dagiti frontliners ken ti intero a komunidad.
Kiniddaw met ti mayor nga itultuloy ti panangsalwad iti salun-at babaen ti naiget a disiplina ken panangsurot kadagiti minimum health standards.
