LAOAG CITY – Inlalwawag ni Mayor Joefrey Saguid iti ili ti Dingras a saan a nakadanon iti pagtaengan da iti Barangay Cali ti kaudian a nagpositibo iti covid-19 a ni IN-C899.
Segun kenni Saguid, nagbalin a pagannurutan iti ili ti Dingras nga amin a sumangpet ket dumalan iti RT-PCR test ken ni IN-C-899 ket negatibo nga antigen test ti inpakita na.
Gapo iti daytoy, kuna ni Saguid nga idi sinukon ti RHU ti indibidwal ket inpan da iti isolation facility ken dimmalan ti swab test ken positibo ti nagbalin a resulta daytoy.
Gutgutiguten na pay dagiti kailyan na a plano a sumangpet a masapol nga RT-PCR test ti ipakita da para iti kinatalged ti pamilya a pagawiden da.
Kunana a dagiti saan a makabael iti presyo ti swab test ket nakasagan ti lokal a gobierno ti Dingras a mangibaklay iti gastosen ti dumalan ti RT-PCR test.
Innayon na a dagiti nagderetso met iti pagtaengan da ken no antigen ti inpakita da iti isasangpet da iti nasao nga ili ket masapol nga ag-isolate ken kalpasan ti tallo nga aldaw ket dumanon ti LGU iti pagtaengan da ken dumalan dagitoy iti swab test.
Kabayatanna, kunana nga awan metten ti nailockdown iti nasao nga ili.
