LAOAG CITY – Inlawlawag ni Mayor Rafael Benemerito iti ili ti Pagudpud ni IN-C6 nga agtawen ti 44, utility worker manipod iti Brgy. Saud ken naidesignar iti quarantine facility ket naka-isolate iti agdama iti Gov. Roque Ablan Senior Memorial Hospital.
Kunana a ti met IN-C9 nga agtawen ti 24 a babai, residente iti ili ti Pagudpud ken nagbiyahe met laeng idiay Metro Manila ket adda iti Mariano Marcos Memorial Hospital and Medical Center iti ciudad ti Batac.
Segun kenni Benemerito, iti panagimbestigar da ket posible a ni IN-C9 ti nakaakar ken ni IN-C6 ti virus gapo ta agtrabtrabaho daytoy iti uneg ti isolation area wenno addaan dagitoy ti direct contact.
Inbatad na a ni IN-C9 ket simmangpet ti ili ti Pagudpud idi Hulyo 8 a naggapo idiay Metro Manila ken naideretso iti quarantine facility, ken ita ti maika-10 nga aldaw na ken dumalan kuma iti rapid test ngem gapo ta nagpasikal ket naitaray iti ospital iti ciudad ti Batac isuta gapo na a dimmalan a dagus iti swab test ken positibo ti resulta na.
Mainaig iti daytoy, kuna na a dagiti nakapulapol ni IN-C6 a nagtrabaho iti isolation area ket naka-home quarantine da kangrunaan na dagiti kaubraan na.
Iti agdama ket naka-lockdown ti isolation area ti nasao nga ili ken ti Rural Health Unit, ken ita nga aldaw ti naituding a pannaka-swab test dagiti maseknan.
Inbaga na a gapo iti daytoy ket agnayun da ti tao kas kadagiti tanod a katulungan ti Office of the Mayor a manggamulo iti sitwasyon nangruna iti Barangay Poblacion dos.
Kabayatanna, kuna ni Benemerito nga immanugot ni Gov. Matthew Marcos Manotoc iti kiddaw na nga awan pay laeng ti makastrek iti ili da a returning resident gapo ta awan ti pakaikabilan dagitoy ken uray dagiti APOR.
Nagpanawagan met ni Benemerito a makikooperar dagiti kailyan na ken aganos dagitoy gapo ta agtinnulong ti gobierno lokal ken gobierno probinsyal a mangsolbar iti agdama a problema.
