LAOAG CITY – Mamati ni House Senior Deputy Majority Leader ken Iloilo Rep. Lorenz Defensor a ti panagbaba ti ratings ni Vice President Sara Duterte kadagiti presidential survey ket resulta ti pannakapaayna a sungbatan dagiti alegasion kontra kenkuana.
Inbatadna a lumawlawa ti ammo dagiti umili mainaig kadagiti sangsangoen nga impeachment complaints ni Vice President Duterte.
Kunana a naruay a Pilipino ti agbuybuya iti telebision, YouTube ken agdengdengngeg iti radyo isut gapuna a masubsubaybayanda ti impeachment proceedings iti Kamara de Representantes.
Inlawlawagna a sigurado a nakaapektar iti ratings ni Vice President Sara ti ad-adu nga ebidensia a naidatag iti impeachment hearings mainaig kadagiti alegasion a saan nga umno a panagusar iti pundo ti gobierno, bribery, corruption ken grave threats.
Reaksion daytoy ni Defensor iti resulta ti presidential survey ti Pulse Asia no sadinno a nagtabla ni Vice President Sara ken Sen. Raffy Tulfo idinto nga iti survey met ti Octa ket bimmassit ti lamang ni Vice President Duterte ken ni dati a Vice President ken itan Naga Mayor Leni Robredo.
