LAOAG CITY – Dakkel a pangta iti operasyon dagiti pribado nga ospital ti in-inot a panagtalaw dagiti nurse ditoy pagilian.
Daytoy ti inadmitir ni Dr. Alan Taylan, agtagikua ti maysa a pribado nga ospital ditoy siudad ti Laoag.
Segun kenkuana, kaaduan kadagiti nurse ket addaanen ti aplikasyon a nakapila tapno agturong iti ballasiw taaw idinto a ti dadduma ket nakapanaw dan ditoy pagilian.
Immuna iti daytoy, inlawlawag ni Taylan a dakkel a katulungan iti operasyon ti ospital dagiti nurse.
Inbatad na a dagitoy ti kangrunaan a mangasistir kadagiti doktor iti nagduduma a desisyon mainaig iti pannakataming dagiti pasyente ken dadduma pay.
Kuna na a kas maysa nga agtagikua ti pribado nga ospital, masapol iti agingga 18 a nurse iti 36 bed capacity wenno 1:2 a ratio iti tunggal pasyente tapno mapalubusan nga agoperar.
Innayun ni Taylan a nu makisassayan ti bilang ti nurses ket malimitaran met ti operasyon ti maysa nga ospital kas iti panagawat ti pasyente.
