LAOAG CITY – Inpasingked ni Police Lt Col. Joseph Baltazar, Hepe ti Philippine National Police ditoy Siudad ti Laoag nga in-inuten a mabigbigbig ken matiltiliw dagiti suspek nga adda iti likudan ti mapaspasamak a petty crimes ditoy Siudad.
Segun kenkuana, nasarakan ti maysa a motorsiklo a natakaw idiay Vigan City, Ilocos Sur kalpasan a maipagarup nga intaray daytoy ti trabahador ti akinkukua ti motorsiklo a taga ditoy Siudad ti Laoag.
Inbatadna a taga ili ti Badoc ti akin-aramid iti pannakaitaray ti nasao a motorsiklo.
Inlawlawagna a nabigbig met ti suspek ti napasamak a panagtatakaw iti Brgy. 16 ditoy Siudad ti Laoag iti kallabes a taga probinsia ti Cagayan no sadino 4 a motorsiklo, 4 a mountain bike, sumagmamano a gadgets pakairamanan dagiti dadduma pay a valuable items iti maysa a pagtaengan ti natakaw.
Kunana a tutukanda a naimbag dagitoy a banag tapno matiliw dagiti suspek nangruna intono malpas ti pannakaselebrar ti fiesta ditoy Siudad ti Laoag tapno ad-adda a maikkanda ti atension ti panangbirok kadagiti suspek.
Maipalagip a napaayaban ti Hepe ti Philippine National Police ditoy Siudad ti Laoag babaen ken ni Bise Mayor Rey Carlos Farinas iti naisayangkat a regular session ti Sangguniang Panlungsod tapno ditoy a maipakaammo kadakuada nga agpanpanday linteg ti panagdur-as ti panangimbestigar dagiti otoridad kadagiti mapaspasamak a petty crimes ditoy Siudad.
