LAOAG CITY – In-inuten a mabukbukel ti istorya no sadinno ti nakaikabilan ti confidential funds, siasinno ti nangala iti daytoy ket kasanu a direkta a nausar ti kwarta.
Daytoy ti inpetteng ni House Prosecutor Legal Spokesperson Atty. Benjamin Tolosa Jr.
Kuna na pay a namin-ado a daras nga inimbitaran ti kongreso dagiti karaman nga indibiwal tapno agpalawag maipanggep iti pannakausar ti pondo, ngem saan a nagatendar dagitoy.
Inbutaktak na pay nga adda dagiti dokumento a maipagarop a ginandat a lapdan ti pannakaiparuk-at ti rekord iti Commission on Audit (COA).
Para ken ni Tolosa, napateg a makita dagiti senator-judge ken ti publiko ti sibubukel a ladawan, aglalo ti maipagarop a panagkedked dagiti karaman iti panangala ti palawag da maipanggep iti panangusar ti confidential funds.
Napateg pay ti panangadmitir ni Gina Acosta a maipagarop nga inbilin ni Vice President Sara Duterte ti pannakaiparuk-at ti kwarta ken ni Col. Dante Lachica, head security ti OVP.
Inpetteng ni Tolosa a nalawag iti rakurak ni Acosta ti maipagarop a chain of control iti confidential funds, aglalo ket naibaga na a saanna nga iparuk-at ti kwarta no awan ti pammilin a mismo manipod iti Bise Presidente.
