LAOAG CITY – Maysa nga ina manipud idiay Texas, U.S.A. ti nakagun-od ti world record kalpasan a nakaidonar isuna ti rinibu a litro ti breastmilk para kadagiti premature a maladaga.
Ni Alyse Ogletree, agtawen iti 36 ket nangrugi nga agidonar idi 2010 kalpasan a naammoanna ti maipanggep iti pagkasapulan dagiti premature babies ti breastmilk.
Ti donasionna ket naikabil iti Mothers’ Milk Bank idiay North Texas no sadinno a ti tunggal ounce ti gatas ket mabalin a pakabenepisiaran dagiti tallo a premature a maladaga.
Malaksid iti daytoy, nangipaay met isuna ti gatas kadagiti pagayamna ken iti Tiny Treasures Milk Bank.
Iti pakabuklan, nakaidonar ni Alyse ti nasurok 2,645.58 liters ti breastmilk a nagbalin a wagas tapno mapadayawan isuna ti world record title a “Largest Donation of Breastmilk by an Individual.”
