LAOAG CITY – Inbatad ni Police Major Edwardo Santos, ti chief of police iti ili ti Pagudpud nga isagsagana dan dagiti dokumento para iti ipila da a reklamo kontra iti maysa nga ina a nangiswitik iti pagturungan na kadwa na dagiti uppat nga annak na.
Iti palawag ni Santos iti Bombo Radyo Laoag, ti inbaga ti saanen a nabigbig nga ina a magna da laeng ditoy probinsya ken naggapo da idiay Cagayan.
Nupay kasta, naduktalan da nga awan ti limmabas iti border control iti ili ti Badoc ken naduktalan a nagawid dagiti aggiina iti Barangay Dipilat iti ili ti Vintar.
Segun ken ni Santos, pilaan da ti nasao nga ina iti panaglabsing iti Republic Act (RA) 11332 wenno Mandatory Reporting of Notifiable Diseases and Health Events of Public Health Concern Act ken Revised penal code 151.
Innayon na nga im-imbestigaren da pay ti kinatao ti driver ti nagluganan dagiti aggiina tapno iraman da a pilaan ti reklamo.
