LAOAG CITY – Natay ti maysa a babai gapo iti maipagarop a naawanan ti reserba ti oxygen bayat nga adda iti Intensive Care Unit ti ospital idiay ciudad ti Batac.
Segun iti saanen a nagpabigbig nga asawa ti babai, nasakit ti nakem na gapo ta saan a naited ti husto a serbisyo iti asawa na nupay nagbayad da ti nasurok 100 a ribo a pisos.
Nupay kasta, inbatad na a saan nga inaramid dagiti nurses ti trabaho da gapo ta awan da iti ICU bayat a maawananen ti oxygen ti asawa na.
Basar kenkuana, ti maysa a nurse ket napan nagmeryenda ken ti maysa ket nabirok ti oxygen ngem nabayag agingga naibus ti oxygen ti asawa na.
Kunana a ti pagsakitan ti nakem da ket ti sungbat dagiti maseknan no apay a nabayag da a napan nangala ti oxygen ket gapo ta adayo ken nagalis ti tiles.
Inbatad na nga idi mapan iti ICU kalpasan nga inayaban ti ipag na ket arig na al-alawenen ti asawa na ti anges na ken agngisit ti rupa ti biktima.
Inpetteng na a sakbay a napasamak ket napigsa ti asawa na.
Mainaig iti daytoy, kalikagom ti lalaki a maikkat iti ospital dagiti dua a nurse gapo ta nagbaybay-a dagitoy iti trabaho da.
