LAOAG CITY – Kinumpirmaran ni Police Lt. Col. Amador Quiocho, hepe ti PNP Laoag a narekobre da ti nausar paltog nga Amrscor caliber 40 agraman dagiti magazine nga addaan ti bala iti pagtaengan ti pamilya Pascua iti P. Gomez Street, Brgy. 15 ditoy siudad ti Laoag.
Daytoy ket seknan ti pannakatay ni Vilma Pascua kalpasan a natamaan ti bala ti paltog iti ulo na kalpasan ti maipagarup nga aksidente a nagputok daytoy bayat ti maipagarup a naginnagawan da iti asawa na a ni Lloyd Pascua.
Segun kenni Quiocho, naglaon iti siam a bala ti maysa a magazine idinto nga uppat met a bala ti naikarga iti sabali pay a magazine.
Kuna na nga a nagpinpinnaturong dagiti agassawa iti nasao a paltog agingga a kelaat a nagputok a nakatamaan ti ulo ti pimmusay a Pascua.
Inbatad ni Quiocho, nga intuloy dagiti agassawa ti naginom iti kuarto da kalpasan a nakapanaw da iti naginoman da iti sentro ditoy siudad.
Inlawlawag na basar iti suspek, nga innala ti biktima ti paltog ken inkalbit na ngem saan a nagputok, idinto nga idi innala met ti suspek ti paltog ket nagputok.
Saan a naripar ti suspek no naiload na ti paltog.
Saan a madeterminar ti hepe no naginnagaw dagiti agassawa wenno nagpinnaturong da.
Segun kenni Quiocho, ituloy dagiti annak ti suspek nga ipila ti reklamo kontra iti ama da.
Innayon na a maibilang nga intensyonal ti pannakapaltog ti biktima a poon ti nakatayan na.
Agtultuloy ti naun-uneg nga imbestigasyon dagiti otoridad kalpasan ti pammaltog.
