LAOAG CITY – Nasakit ti nakem ken emosyunal nga inistorya iti Bombo Radyo Laoag ni Mrs. Felifa Agoo iti Barangay Naglicuan iti ili ti Pasuquin ti nakapasamakan ti anak na kalpasan a nadesgrasya ken pimmusay.
Segun kenni Mrs. Agoo, kalpasan a maipagarop a nadesgrasya ti saanen a nainaganan nga anak na ket innala dagiti kameng ti PNP-Pasuquin sakbay a naikabil ti Rural Health Unit (RHU).
Nupay kasta, kuna ni Agoo nga idi adda iti RHU ti bangkay ken timmawag da lattan iti punerarya ken dagus a nabalsamar iti laksid a saan pay a naipakaammo kadakuada a pamilya ti biktima a pimmusayen daytoy.
Inlawlawag na a saan da nga ammo a natay ti anak na gapo ta awan pulos ti timmawag kenkuana nga adda ti napasamak iti anak na.
Inpetteng na a dua nga oras kalpasan a natay ti anak na ket nagturongen dagiti papagayam ken kabsat ti biktima iti PNP iti nasao nga ili ngem maipagarop a ti inbatad laeng dagiti pulis ket addan iti punerarya ti bangkay ken isu ti pangkitaan da.
Inbatad na nga idi nakasarita da pay iti PNP seknan iti daytoy ket maipagarop a ti laeng sungbat dagiti pulis ket saan da a trabaho ti agbantay ti bangkay iti igid ti kalsada gapo ta adda ti trabaho da.
Masdaaw ni Agoo no apay a saan a naipakaammo wenno nasaludsod kadakuada a pamilya no sadinno a punerarya ti kayat da a pakaikabilan ti anak na.
Daytoy ket gapo ta ti nakaikabilan ti anak na a punerarya ket agpabpabayad ti 25 a ribo a pisos ken no agdesisyon ti pamilya nga irwar ti bangkay ket masapol nga agbayad da ti 10 a ribo a pisos.
Kunana a naamoan laeng dagiti kakabsat ti biktima a natayen idi adda ti timmawag iti kapitan da a nangipakammo a ti anak na ket addan iti punerarya.
Innayo na a naamoan na laeng idi pinagawid da isuna nga adda ditoy ciudad ti Laoag idi adda ti napasamak iti anak na.
