LAOAG CITY – Emosyunal a nagkamang iti Bombo Radyo Laoag ti maysa nga ina a ni Mrs. Merlita Lazaro iti Brgy. 55-Vira ditoy siudad ti Laoag.
Daytoy ket tapno matulungan nga agawid ti anak na a ni Janice Lazaro Robella, agdama nga apapaay kas OFW idiay Jeddah, Saudi Arabia.
Iti innuman ti Bombo Radyo Laoag ken ni Lazaro, kuna na nga ikidkiddaw ti anakna ti panagawid na ditoy pagilyan.
Inbatad na nga arisgaran ti anakna ti agawid gapu ta nabayagen a saan a nagsweldo.
Kuna na a maipagarup nga idi pay laeng Nobiembre ti naudi a panagsweldo ti anak na agsipod ta isu met ti naudin a pannakaipatulod na ti kwarta kadakuada.
Mainaig iti daytoy, inpakaammo ni Lazaro nga iti naudi a panagsarita da iti anakna a ni Robella ket pimmanawen iti sidong ti amo na.
Inbatad na nga addan uppat nga aldaw sipod idi naudi a nagsarita da ken agpapan itat ket awan pay a pulos ti damagna manipod iti anakna.
Naamoan nga addaan ti tallo nga anak ti Robella ken maymaysa a mangisaksakad kadagitoy.
Kabayatanna, naiyuman a dagus iti OWWA ti kalikagum ni Lazaro ken manamnama a matratar ti kaso ti anakna ita nga aldaw.
