LAOAG CITY – Inbatad ni Mrs. Arcelie Alegado iti Barangay Waig-Upay, Paoay, Ilocos Norte a saanna a mailadawan ti kinaragsak na idi makita na ti panagmartsan kangrunaan na idi mapan awaten ti anak na a ni Loreto Alegado Jr. ti diploma na iti kalepleppas a graduation rites iti Philippine Military Academy (PMA) .
Inadmitir na a saan na a ninamnama a makaturpos ti anak na gapu ti kinarigat ti biag iti uneg ti akademya.
Segun ken ni Mrs. Alegado, sakbay a simrek iti PMA ti anak na ket nagadal pay laeng daytoy iti eskwela ti madre idiay Baggao, Cagayan ken nagdua a tawen ti kurso na nga accountacy ken daytoy ket nagbalin a working student.
Nupay kasta, inlalawag ni Mrs. Alegado a gapu ti kinarigat ti panagbiag ken awan ti namnamaen ti anak na a mangtulong kenkuana ti pinansyal ket nagdesisyon a napan nageksamen iti PMA entrance examination.
Inbatad ni Mrs. Alegado nga awan pulos ti naibagbaga ti anak na a problema na iti uneg ti akademya bayat ti panagadal na.
Innayon na a ti uliteg ni Loreto a ni Dennis Orque ti kangrunaan a nangimpluwensya kenkuana tapno mapan agadal iti PMA.
