LAOAG CITY – Nasakit ti nakem ni Mrs. Judelyn Rangpas, ti ina ti maysa a PWD iti Barangay Bengcag ditoy ciudad ti Laoag iti kapadasan na kabayatan nga agpaxerox kuma iti ID iti barangay hall.
Segun kenni Rangpas, benepisyaryo ti anak na nga addaan ti rangkap iti bagi na ken umawat ti tulong manipud iti Department of Social Welfare and Delvelopment (DSWD).
Ditoy nga inbaga kenkuana ti pannakabagi ti ahensya a nga ipaxerox na pay ti maysa nga ID ti anak na, iti mismo nga opisina ti barangay hall.
Inbatad na a gapo iti daytoy ket inasitgan na ti agnagan ti Dianne Domingo tapno kiddawen nga ipaxerox na ti ID ngem maipagarop nga “awan manang” laeng ti sungbat ti maseknan.
Gapo iti daytoy ket inbaon na ti asawa na a mapan agpaxerox ngem kalpasan ti sumagmamano a gundaway ket nakita na ni Domingo a maipagarop nga iggem na ti ID ken papel nga ipaxerox na a para iti maysa pay a benepisyaryo.
Inlawlawag ni Rangpas a maipagarop pay nga inlemmeng pay ni Domingo ti iggem na nga ID nangruna ket limmabas iti sangwanan da.
Kunana a nakasarita na pay ti lakay a maysa pay a benipisyaryo ken mismo a daytoy ti nangibaga nga iyur-uray na ti inpaxerox na nga ID na iti opisina ti barangay hall.
Immapela ni Rangpas kadagiti addaan ti akem iti barangay a patas ti trato dagiti kabarangayan da.
