LAOAG CITY – Mangnamnama ni Atty. Donato Balderas Jr., ti Schools Division Superintendent ti Department of Education – Ilocos Norte nga agbalin a maysa a potensial a Coconut Producers ken Fruit Bearing Trees iti Ilocos Norte Agricultural College iti ili ti Pasuquin.
Segun kenkuana, bayat ti ibibisita ni Deparment of Education Undersecretary Epimaco Densing III iti Schools Division Office ti Ilocos Norte ket nakita a dakkel ti potensial ti nasao a pagadalan iti benneg ti agrikultura ken farming activities.
Inbatadna a kitkitaen ti departamento no ania ti mabalin a maipaay a tulong a pakabenipisiaran dagiti estudiante ken mangisursuro iti nasao a pagadalan.
Kunana a saan a mailinged nga adu dagiti seedings ti niyog a naimula iti nursery section iti nadakamat a pagadalan.
Innayonna a mamati nga agbalin a top producers ti Ilocos Norte Agricultural College iti copra wenno coconut oil iti masangoanan.
