LAOAG CITY – Inbatad ni Atty. Arnedo Valera iti Washington D.C. a ti dati nga historical event nga inagurasyon ti baro a presidente ti Estados Unidos ket maibilangen a national security event.
Daytoy ket gapu iti posibilad nga adda ti mapasamak a panagraot wenno tignay protesta kabayatan ti inagurasyon.
Segun ken ni Valera, adon dagiti pangta a timpuar mainaig iti maiyuswat nga inagurasyon pakairamanan ti pangta kadagiti kameng ti media nga ag-cover iti daytoy.
Mainaig iti daytoy, kuna nga addan ti nasurok 21,000 a national guard troops iti 50 nga estado ti Amerika tapno mangited ti seguridad kadagiti state capitols kabayatan ti inagurasyon ni President-elect Joe Biden intuno Enero 20.
Kuna na a daytoyen ti kadekkalan a bilang dagiti naideploy a militar para iti maysa nga inagurasyon.
Kabayatanna, inpakaamo ni Valera a nakalockdown ti intero a Washington DC, ti lugar a pakaangayan ti inagurasyon.
Inbunannag napay nga awanen dagiti nakalukat nga establisyimento pakairamanan dagiti hotel a nangikanselar kadagiti reservations.
Maipalagip nga idi Enero 6 ita a tawen, naraot ken naserrek ti US capitol idiay Washington DC babaen kadagiti supporters ni outgoing president Donald Trump gapu iti pammati dagitoy a naswitik ti 2020 US election.
