Inbilin ti International Court of Justice (ICJ) a dagus nga isardeng ti Israel ti operasion militarna idiay Rafah City iti Gaza.
Ti nadakamat a pangngeddeng ket sungbat iti panangipila ti South Africa idi napan a Domingo iti proceedings a nakaakusaranna ti Israel babaen ti genocide.
Iti nairuar a court ruling babaen ti presiding judge Nawaz Salam, rumbeng nga isardeng ti Israel ti military offensive-na ken sumagmamano a panangraut idiay Rafah a pakaigapuan ti pannakadadael ti Palestine ken daytoy ket mabalin a maibilang a maysa a kita ti genocide iti sidong ti international law.
Mainaig iti daytoy, mainget a pinagkedkedan ti Israel ti nadakamat nga alegasion ken saanda a suroten ti pammilin a maisardeng ti operasionda.
Kabayatanna, inawat ti Hamas daytoy nga addang ti International Court of Justice a rumbeng a mangpasardeng ti panangraut idiay Rafah.
