LAOAG CITY – Inpasigurado ni Mrs. Shirley Agsunod, School Principal IV iti Ilocos Norte College of Arts and Trade (INCAT) a nakasagana dan para iti pannakaiyuswat ti limitado a face to face classes intono Lunes, Pebrero 21.
Segun kenni Agsunod, 142 amin nga estudyante manipud iti Grade 11 ken 12 ti makipagpaset ken dagitoy ket nakapasa iti screening kas iti consent iti nagannak ken masapol a fully vaccinated.
Inbatad na a dagiti makipagpaset ket dagiti estudyante a kasapulan ti laboratory works na kas iti automotive, cookery, computer servicing.
Kunana a 10 laeng nga estudyante ti sumrek iti maysa nga aldaw, ken agpapot iti uppat nga oras ti panagklase da.
Inlawlawag na a nakikoordenar da iti lokal a gobierno ti ciudad ti Laoag ke dagiti tanod nga isu ti katulungan dagiti PTA officers a mangasistir para iti implementasyon.
Basar kenkuana, sakbay a sumrek iti mismo a pagadalan dagiti estudyante, makita pay laeng ti temperatura da, adda ti attendance no sadinno ket iberipikar ti security guard no karaman met laeng ti ubing kadagiti 142 a makipartisipar.
Adda pay ti directional arrow ken dagiti signages tapno saan a maiyaw-awan dagiti estudyante, ken sakbay a sumrek dagitoy iti classroom ket maala manen ti temperatura dagitoy.
Dinakamat na nga adda ti doktor ken nurse iti nasao a pagadalan nga isu ti mangkita ti salun-at dagiti estudyante.
Naamoan nga ado pay dagiti mangayat nga estudyante a makiparsitipar iti limitado a face to face classes ngem nagdesisyon da nga ummuna dagiti adda iti Grade 11 ken 12.
Kabayatanna, mangnamnama ni Agsunod a mapalawan to pay ti limitado a face to face classes iti nasao a pagadalan.
