LAOAG CITY – Nakasagana ni incoming Department of Education (DepEd) Secretary Sonny Angara a makatrabaho ti siasinno man.
Daytoy ket kalpasan a nagikkat iti pwesto ni Department of Education Undersecretary Michael Poa.
Malaksid ken ni Poa, nagikkat payen iti pwesto da Undersecretary for Admin Nolasco Mempin, Assistant Secretary Sunshine Fajarda, Assistant Secretary for Procurement Reynold Munsayac ken Assistant Secretary for Admin Noel Baluyan.
Inbatad ni Angara nga adda dagiti nakasagana a serye ti pannakitaripnong na kadagiti opisyal ti Department of Education sakbay pay ti opisyal a turnover ceremony, intono Huwebes, Hulyo 18, 2024.
Nupay kasta, kuna ni Angara a saan pay a personal a nakipagkita ken ni Vice President ken outgoing Department of Education Secretary Sara Duterte.
Inrakurak ni Angara a ti ‘timing’ ti appointment na kas baro a sekretaryo ti Department of Education ket napateg kangrunaan na ket aglukaten ti klase intono Hulyo 29 ken dandanin ti budget season.
