LAOAG CITY – Kwinestyunaran ti Independent Commission for Infrastructure ti flood control project iti Metro Gabu ditoy ciudad ti Laoag gapu ta namindua a nakontrataan.
Daytoy ti naduktalan kabayatan ti panaginspeksyon da Independent Commission for Infrastructure Special Adviser Rodolfo Azurin Jr., Baguio City Mayor Benjamin Magalong ken Department of Public Works and Highways Undersecretary Arthur Bisnar ditoy probinsya.
Ti nasao a proyekto ket napondoan ti sag-50 a milyon a pisos no sadinno a ti maysa ket 66% paylaeng ti nalpas idinto a ti maysa ket adda paylaeng ti 72% ti naileppas.
Adda pay ti panangkwestyunar ni Magalong no apay a saan a maymaysa a pondo ti nailatang para iti saan a nalpas a paset ti proyekto.
Malaksid ti flood control project ket kwinestyunaran pay ni Mayor Magalong dagiti sheet pile iti nadakamat a barangay gapu ta saan nga agpapada ti kaatiddogna.
Inlawlawag ni Magalong a ti rumbeng koma a kaatiddog dagiti sheet pile ket 12 a metro, ngem adda dagiti innem ken walo a metro idinto a dagiti dadduma ket tallo a metro.
Mainaig iti daytoy, inbalakad ni Azurin a masapol nga adalen a naimbag dagiti inhinyero dagiti ipatungpal da a proyekto tapno saan a masayang dagiti pondo ti gobierno.
Innayon na a no aniaman ti ikeddeng ti Department of Public Works and Highways nga standard para kadagiti proyekto aglalo kadagiti flood control ket masapol nga artapan dagiti ipatpatungpal kadagitoy tapno masigurado a saan nga alisto a madadael uray adda dagiti mapasaran a kalamidad kas ti bagyo.
Rakurak daytoy ni Azurin kalpasan a saan pay a nalpas ti proyekto ken ado pay dagiti nasken a matrabaho iti baet a ti deadline daytoy ket intono Enero 24, 2026 no sadinno a ti maibagbaga a rason ket gapu kadagiti naglabas a bagyo.
Immunan a napan naginspeksyon ti Independent Commission for Infrastructure iti Nueva Era, Vintar ken ditoy ciudad ti Laoag.
Inpakaammo ni Azurin a kadagupan kadagiti ininspeksyon da a flood control projects ditoy probinsya ket awan ti naduktalan da a ghost project.
