LAOAG CITY – Inrakurak ni US President Donald Trump nga aramiden ti India ti umiso seknan iti panangideportar ti Estados Unidos kadagiti illegal immigrants.
Inaramid daytoy ni Presidente Trump kalpasan ti panagsarita da ken ni Prime Minister Narendra Modi iti telepono.
Kuna ni Trump a daytoy ti kaunaan a gundaway a nagsarita da ken ni Modi sipud nagtugaw manen kas presidente iti Amerika.
Innayon na a karaman kadagiti nagsaritaan da ken ni Modi ket maipapan iti immigration, security issues ken trade nga indiskribir ti White House kas “productive call”.
Mainaig iti daytoy, inpakaammo ni Trump a plano ni Modi ti mapan bumisita iti Estados Unidos intono Pebrero ita a tawen.
