LAOAG CITY – Mapan bumisita ni Indian Prime Minister Narendra Modi idiay Ukraine, sumagmamano a lawas kalpasan ti kaunaan a gundaway nga ibibisita na idiay Moscow sipud rimmaot ti Russia.
Daytoy met ti kaunaan a gundaway a mapan bumisita ni Modi idiay Ukraine sipud nangrugi ti gubat iti nagbaetan da iti Russia.
Maipalagip a namin-adon a daras a nagpanawagan ti ceasefire ni Modi iti Ukraine ngem nag-abstain daytoy manipod iti amin a resolusyon ti Ukraine ken ti United Nations.
Ti India ket nagtalinaed a nakadependar iti Kremlin para iti military equipment ti pagilian ken ipapaayan ti Russia ti diskwento ti gatgatangen na a langis.
Maipalagip a nadismaya ni Ukrainian President Volodymyr Zelensky iti panangarakop ni Modi ken ni Putin bayat ti panagtaripnong da iti kallabes.
Indiskribir ni Zelensky a ti naiwayat a taripnong da Modi ken Putin kas dakkel a pannakadismaya ken nangdadael ti panangikarkarigatan a maipatungpal ti kapia kangrunaan na no makita ti lider ti “world’s largest democracy” a mangarakop ti maibilang kas “ world’s most bloody criminal” iti Moscow.
Nupay kasta, inkalintegan ni Modi a kas pagayam ket kanayun a ti prayoridad ken kapatgan kenkuana ket ti pannakapagtalinaed ti kapia para iti naan-anay a panagdur-as ti sumarsaruno nga henerasyon.
