LAOAG CITY – Kalikagum ni Indigenous Peoples Representative Cheryll Bromeo Tabangay ti Sangguniang Panlalawigan a maidanon ti serbisio ti gobierno kadagiti dadduma pay nga Indigenous Peoples ditoy Ilocos Norte nangruna kadagiti agnanaed iti nasusulinek a paset ti probinsbia.
Daytoy ti nagbalin a kiddaw ti Indigenous Peoples Representative kageddan ti pannakaselebrar ti National Indigenous Peoples Month.
Segun ken ni Tabangay, sipod idi nagtugaw isuna kas Indigenous Peoples Mandatory Representative ti Sangguniang Panlalawigan idi Enero 11, 2022 ket ad-adda a naikkan ti oportunidad dagiti padana nga Indigenous Peoples iti benneg ti edukasion, salun-at, pamastrekan ken dadduma pay.
Kunana a babaen iti akemna ket makatulong tapno maitandudo ken mapadur-as pay ti agdama a “socio -economic development” dagiti Indigenous Peoples manipud kadagiti 10 nga ili ditoy probinsia.
Inlawlawagna a ti kaadda ti Indigenous Peoples Mandatory Representative ket mangpabileg ti panagkaykaysa dagiti Indigenous Peoples kas maysa a komunidad para iti agtultuloy a panagdur-as ditoy probinsia.
Innayonna nga adda ti naiyuswat a Regional Indigenous Peoples Summit ita nga aldaw idiay probinsia ti Ilocos Sur.
