LAOAG CITY – Nagkamang iti Bombo Radyo Laoag ni Mr. Pepito Palanggoy a residente iti Barangay Calioet-Libong iti ili ti Bacarra gapo ta agtultuloy nga adda ti electric bill na iti laksid a naperdi ti kuntador da.
Segun kenni Palanggoy, agarop dua a tawenen iti napalabas sipud inreklamo na daytoy iti kooperatiba kangrunaan na iti administrasyon ni Mr. Bing Agdigos.
Ditoy a napagtutulagan da a maipatungpal ti flat rate wenno maideklara iti electric bill iti kada bulan a 120 kilowatt-hours (kWh) ti makonsumo na.
Nupay kasta, iti napalabas nga electric bill na ket nalablabes ngem ti napagtutulagan a kilowatt-hours (kWh) ti maikabkabil iti resibo.
Gapo iti daytoy, nagturong iti kooperatiba ken ti kanayon a maipasigurado kenkuana a masukatan ti kuntador ngem agpapan ita ket awan ti nagbalin nga addang da isut gapo na a nagkiddaw ti tulong iti Bombo Radyo Laoag.
Mainaig iti daytoy, dagus met a naipadanon iti Ilocos Norte Electric Cooperative (INEC) Asst. General Manager Perry Martinez ken personal a nagturong iti pagtaegan ni Palanggoy.
Nakapungtot met ni Martinez iti naduktalan na ken ibilang na a maysa manen nga anomalya daytoy ken arig na saanen a general manager ti akem na no diket janitor gapo ta isunan ti mangdaldalos iti problema iti napalabas nga administrasyon.
Inpasigurado met ni Martinez a masukatan ti kuntador ni Palanggoy kageddan ti pannakaiyuswat ti imbestigasyon ken no maduktalan ti meter reader a nangaramid iti daytoy ket nasken a maikkan ti pagmenna-mennaan na.
Inbatad na pay aposible nga umabot iti 200 agingga iti 300 kilowatt-hours iti kada bulan ti makunkunsumo ti member-consumer basar kadagiti appliances ken kadakkel ti pagtaengan.
