LAOAG CITY – Kinumpirmaran ni INEC Board President Enrico “Cocoy” Ruiz a maitantan ti eleksyon iti kina-director iti nasao a kooperatiba.
Ummuna iti daytoy, kuna ni Ruiz nga idi bulan ti Disyembre ket nagturong ni General Manager Felino “Bing’ Agdigos iti National Electrification Administration (NEA) ken idi agsubli ditoy probinsya ket naipakammo kadakuada nga adda ti maangay nga eleksyon ken masapol nga adda ti pammalubos ni Gov. Matthew Marcos Manotoc.
Inbatad na a nangited met ti permit ni Manotoc para iti pannakaiyuswat ti eleksyon ita a bulan.
Nupay kasta, adda dagiti nangipasa ti resolusyon para iti pannakaitantan ti eleksyon kas iti League of the Municipalities of the Philippines (LMP), simmaruno ti Liga ng mga Barangay ken ti Junta Probinsyal gapo iti agdama a sitwasyon ti covid-19.
Kalpasan daytoy, kuna ni Ruiz nga adda ti surat kenkuana ni Gov. Manotoc a mangipakpakammo ti pannakaitantan ti eleksyon agingga a bumaba ti kaso ti virus.
Kunana a mangaay to laeng ti eleksyon no adda to manen ti permit nga ited ni Manotoc.
