LAOAG CITY – Nasakit unay ti nakem ni Mr. Enrico “Cocoy” Ruiz, INEC Board President iti maipagarop a pannakailanglangi dagiti consumers a residente iti ili ti Dingras a mapan kuma agbayad ti kuryente iti main office.
Segun kenni Ruiz, ti maysa kadagiti rumrumuar a rason ket no residente iti ili ti Dingras ti maysa nga indinidual ket maipagarop a saan a rumbeng a sumrek iti nasao a kooperatiba.
Kunana a aan na a maawatan no apay nga adda ti report a saan a mapastrek dagiti residente iti ili ti Dingras iti laksid a naiget met a masursurot amin a protocols.
Inlawlawag na a no sumrek iti main office iti INEC ket adda ti logbook, maala ti temperatura, agbunggo iti ima, adda ti pagpigadan nga adda ti agas na, nakasuot ti face mask ken face shield, ken adda ti glass shield kadagiti amin a pagbayadan.
Inpetteng ni Ruiz a maibilang daytoy a diskriminasyon kadagiti consumers ken panangibaba iti sibubukel a Dingras.
Inbatad na a ti pammilin ket maipagarop nga aggapo iti management ngem saan a pulos a naipakammo kenkuana.
Mainaig iti daytoy, kunana a masapol a mairupir wenno mailaban ti kalintegan ti maysa nga indibidual.
Kabayatanna, inpetteng na a daytoy a banag ket matratar iti sumaruno a board meeting kageddan ti panangipasigurado na a saan na a baybay-an dagiti consumers a kailyan na kas maysa nga opisyal ti kooperatiba.
