LAOAG CITY – Balligi a nairubuat ti INEC Charging Station iti ili ti Pagudpud.
Segun ken ni Mr. Perry Martinez, Acting General Manager ti Ilocos Norte Electric Cooperative, babaen iti daytoy a proyekto a nagbinnuliganda ti maysa a private company ket dakkel ti maala a benepisio ti kooperatiba.
Inbatadna nga adda ti bingay a 15 a porsiento ti Ilocos Norte Electric Cooperative kadagiti bayadan dagiti consumers nga agpa-charge kadagiti luganda nga electric vehicles iti nasao a charging station.
Inlawlawagna a napili iti ili ti Pagudpud a pakaipasdekan ti INEC Charging Station gapu iti gagem nga ad-adda a magutigot dagiti turista nga agpasiar iti lugar.
Kunana nga adda ti manarimaan a negosasion iti nagbaetan ti private company ken ti dakkel a mall iti ili ti San Nicolas a mangipatakderda met ti kapada a charging station para kadagiti electric vehicles.
Kabayatanna, inpakaammo ni Mayor Rafael Benemerito iti ili ti Pagudpud a dakkel a tulong iti panagpadur-as iti benneg ti turismo iti baro manen a naipasdek a proyekto iti ilida.
