LAOAG CITY – Sinaludaran ni Gob. Matthew Marcos Manotoc ti Ilocos Norte Electric Cooperative iti nangato a grado a nagun-udna manipud iti National Electrification Administration.
Daytoy ket kalpasan a nairaman ti Ilocos Norte Electric Cooperative kadagiti 88 nga Electric Cooperative iti pagilian a naipaayan iti grado a“triple A”wenno “AAA” a kangatoan a grado nga ipapaay ti National Electrification Administration kadagiti EC iti pagilian.
Basar iti 2023 EC Overall Performance Assessment and Size Classification nga inyetnag ti National Electrification Administration, maysa ti Ilocos Norte Electric Cooperative kadagiti 8 nga EC a pimmintas ti “performance level” da iti napalabas a tawen 2023 no idasig idi tawen 2022.
Nagyaman ti gobernador iti napintas a panagkakammayet dagiti agdama nga agserserbi iti Ilocos Norte Electric Cooperative pakairamanan dagiti Board of Directors kangrunaanna ken ni Mr. Cipriano “Perry” Martinez nga Acting General Manager ti kooperatiba a nangipaay ti napintas a serbisio kadagiti umili.
Inbatadna a saanna a ninamnama nga iti uneg ti nakurkurang ngem maysa a tawen ket makita ti dakkel a nagbaliwan ti Ilocos Norte Electric Cooperative kangrunaanna iti pannakabaelna a nangiyalat iti grado a “triple A”.
Naammoan a nagpada ti Ilocos Norte Electric Cooperative ken ti BENECO a ngimmato ti performance level da manipud iti “double A” idi tawen 2022 ket nagbalin nga “triple A”.
Mangnamnama ni Gob. Marcos Manotoc a babaen iti agtultuloy a napintas a panagkakammayet dagiti adda iti Ilocos Norte Electric Cooperative ket agtultuloy a madalusan ti kooperatiba ken mamantener ti “triple A” a gradona kadagiti sumarsaruno a tawen.
