LAOAG CITY – Naipasigurado nga awan ti problema ti “supply” ti kuryente ditoy Ilocos Norte kabayatan ti Region One Athletic Association meet.
Segun ken ni Atty. Athena Nicolette “Nikki” Pilar, bise presidente ti board of directors ti Ilocos Norte Electric Cooperative kas pannakabagi ti National Electrification Administration wenno NEA iti nadakamat a kooperatiba, adda ti direktiba ni Acting General Manager Cipriano “Perry” Martinez a makanselar dagiti naka-schedule a panagpukaw ti kuryente nangnangruna kadagiti lugar a pakaapektaran dagiti pakaisayangkatan ti Region One Athletic Association meet.
Inlawlawagna a babaen iti daytoy ket awan ti ania man a tumaud a problema kadagiti nadakamat a lugar nangnangruna ket nabara ti panawen.
Nupay kasta, impalgakna a no adda dagiti mapasamak a bigla a panagpukaw ti kuryente a saan a kontrolado ti Ilocos Norte Electric Cooperative ket adda ti pammilin a masapul ti panaggunay a dagus dagiti “linemen” ken dagiti “technical team”.
Kabayatanna, inpakaammo ni Pilar a nupay adda dagiti pakaammo ti National Grid Corporation of the Phil. wenno NGCP a pannakaipatungpal ti “manual load dropping” ket saan pay a naipatungpal agsipud ta mais-stabilize met laeng ti supply.
