LAOAG CITY – Nagyaman ni Ilocos Norte Electric Cooperative Acting General Manager Perry Martinez iti National Bureau of Investigation ditoy probinsya nga idaulwan ni Director Jaime Santiago iti agtultuloy a suporta da iti kooperatiba.
Segun ken ni Martinez, kadwa da ti National Bureau of Investigation nga agim-imbestigar iti nagbalin a duktal ti National Electrification Administration nga unaccounted ken mapukpukaw a pondo ti kooperatiba iti Employee Retirement Benefit Plan.
Ti Ilocos Norte Electric Cooperative ken National Bureau of Investigation ti agtintinnulong tapno maikkan hustisya dagiti empleado a nagsakripisyo a nangibukbuk ti panawen da nga agserbi iti kooperatiba ken ti pannakaipataw ti pannusa kadagiti naglabsing.
Maipalagip nga immunan nga inpublikar ni Martinez ti pannakapukaw ti pondo ti kooperatiba iti Employee Retirement Benefit Plan no sadinno nga adda dagiti pinatuludan na ti surat tapno agpalawag idinto a dagiti dadduma ket napilaan dan ti kaso.
Kabayatanna, in-inot metten a maipapaay ti retirement benefit dagiti nagretiron nga empleado ti kooperatiba malaksid kadagiti naduktalan a karaman iti isyu.
