LAOAG CITY – Inadmitir ni Mr. Noel Andres, ti pannakangiwat ti Ilocos Norte Electric Cooperative (INEC) nga adda ti panagngato ti singir iti kuryente kadagiti naglabas a bulan.
Inlawlawag na nga idi Pebrero ket P12.4613 ti singir iti kilowatts per hour a konsumo iti kuryente ken idi Marso ket nagbalin a P14.1123 iti kada kilowatts per hour wenno adda ti P1.65 ti nagngatoan na iti maysa a bulan.
Kuna na nga adda ti nagbabaan ti singir idi Abril ngem apagapaman laeng.
Kabayatanna, inlawalwag na a gapu iti nangatngato a konsumo ita a bulan ti Abril ket arig a saan a madlaw ti publiko ti apagapaman a panaglaka ti singir.
Immunan nga inpakaammo ni Andres a ti makagapu ti panagngato ti singir ket ti presyo iti maangkat a paggapoan ti kuryente manipod iti independent power producers.
Kuna na a basar iti datos, ti generation charge ket ngimmina iti P0.20/kwph sabali pay iti system loss ken transmission charge ti NGCP.
Kabayatanna, kiniddaw ni Andres iti publiko nga awaten ti sitwasyon gapu ta dagiti pagang-angkatan ti kuryente dagiti nangipato ti presyo.
