LAOAG CITY – Nakadanunen ti Ilocos Norte Electric Cooperative nga idadaulwan ni Acting General Manager Perry Martinez III iti ili ti Bacarra tapnu agikkat kadagiti naabandonar ken saanen a maus-usar a poste ken waya partikular iti Quezon Blvd.
Kadwa ti nasao a kooperatiba dagiti pannakabagi ti local telecommunication company ken cable company.
Segun iti kooperatiba, gagem ti nasao nga aktibidad ket tapno maurnos dagiti linya a naikonektar kadagiti poste ti Ilocos Norte Electric Cooperative ken nataltalged met laeng dagitoy.
Malaksid iti daytoy, babaen iti pannakaikkat dagiti nakatiwangwang a waya ket maliklikan pay ti possible a risgo a maipaayna kadagiti residente ken ti epektona iti electrical system.
Maysa laeng daytoy nga inisyatibo ti kooperatiba iti commitment da a mangipaay ti napinpintas a serbisyo ditoy probinsia.
