LAOAG CITY – Kinumpirmaran ni Ilocos Norte Electric Cooperative (INEC) Board President Cocoy Ruiz a mangrugi manen ti “operation putol” wenno ti pannakaputol ti koneksyon ti elektrisidad kadagiti saan a makabayad intono Agosto, wenno 10 nga aldaw kalpasan ti pannaka-reading ti metro iti nasao a bulan.
Daytoy ket maiyaplikar kadagiti saan a nakabayad ti bill ti kuryente manipud iti Marso agingga ita a bulan.
Kunana a pakadagupan kadagiti amin a member consumer ket 18 a ribo a miembro ti saan pay a nakabayad manipud kadagiti nadakamat a bulan.
Segun kenni Ruiz, marigatanen ti kooperatiba gapo ta agang-angkat laeng ti elektrisidad ken masapol da met a bayadan dagiti pagalan da, ken saan a patas para kadagiti natulnog nga agbaybayad.
Inlawlawag na a saan da nga ipalubos a saan a masuplayan ti INEC ti elektrisidad isut gapo na nga ipatungpal da daytoy nga addang.
