LAOAG CITY – Mapaayaban ti Ilocos Norte Electric Cooperative wenno INEC iti sumaruno a maisayangkat a Regular Session ti Sangguniang Panlalawigan inton Agosto 31, aldaw ti Martes.
Daytoy ket kalpasan nga indasar ni SK Federated President Rafael Salvador Medina ti reklamo dagiti sumagmamano nga consumers gapu iti kellaat a panagngato ti bill ti kuryente iti bulan ti Hulio ken Agosto iti daytoy a tawen.
Kunana a naapektaran dagiti residential ken dagiti commercial establishiments.
Daytoy ti inrakurak na kabayatan ti Other Matters ti Regular Session ti Sangguniang Panlalawigan a nanggundawayan na tapno maikkan ti atension dagiti reklamo dagiti kaprobinsiaan.
Malaksid iti kadakkel ti bill ti kuryente nga awan pakaammo ti INEC ket kwinestionarann a pay ti arig na nasaksakbay a panag-reading ti consumption ti bill ti kuryente kadaytoy aldaw a saan pay napasangbay wenno maipalubos kadi ti assumption a maaramid.
Immuna ngem iti daytoy, kinumpirmaran ti INEC nga arig na piso ti ngimatoan ti presio ti per kilowatt hour gapu ta ngimmina ti transmission ken generation supply nga ang-angkaten ti INEC iti NGCP wenno National Grid Corporation of the Philippines.
Kabayatanna, segun ken ni Mr. Noel Andres, pannakangiwat ti Ilocos Norte Electric Cooperative a nakasagana daytoy a mangilawlawag pakaseknan iti daytoy a banag iti biang ti Sangguniang Panlalawigan.
Iti agdama ket awan met pay ti naawat ti INEC a surat a panangimbitar kadakuada iti Sangguniang Panlalawigan.
