LAOAG CITY – Nakaawat ti naruay a pammadayaw ti Ilocos Norte Electric Cooperative wenno INEC kabayatan ti NEA Lumens Award 2025.
Segun ken ni Acting General Manager Perry Martinez iti nasao a kooperatiba, daytoyen ti maikadua a tawen a nakaawatda ti pammadayaw kas Top Performing Cooperative.
Inbatadna a nagun-odda daytoy gapu iti napintas a financial management, technical ken institutional service babaen ti pannakaipaay ti kapintasan a serbisio kadagiti Member-Consumer-Owner.
Inlawlawagna a daytoy ti kangatoan a naawat a pammadayaw ti kooperatiba malaksid laeng ti Most Outstanding Cooperative Award ngem masapul a lima a tawen a mapadayawanda kas Top Performing Cooperative tapno magun-odda daytoy.
Malaksid iti daytoy, nabigbig pay ti Ilocos Norte Electric Cooperative kas Best Collection Efficiency, Electric Cooperative with High AGMA attendance ken Compact of Cooperative Award.
Kuna ni Martinez a dagitoy a pammadayaw ket resulta ti naiget a kooperasion dagiti amin a Member-Consumer-Owner ken dagiti empleado.
Innayonna a ti collection efficiency ti kooperatiba ket 98% uray adda dagiti gundaway nga adda dagiti saan a makapag-comply ngem adda ti rasonna.
