LAOAG CITY – Simrek ti Ilocos Norte Electric Cooperative (INEC) ti maysa a tawen nga Emergency Power Supply Agreement (EPSA) iti Aboitiz Power Corporation iti babaen ti Therma Power Inc.
Iti ceremonial signing ket indaulwan ti executive management ti Ilocos Norte Electric Cooperative iti panangidaulo ni General Manager Cipriano Martinez III, INEC Board President, Atty. Nick Malasig ken ti mangibagi iti Aboitiz a ni Mr. Jerry Padilla.
Segun ken ni Martinez, iti babaen ti katulagan ket mangipaay manen ti Aboitiz ti sabali a 10megawatts a suplay ti kuryente, aglalo iti summer season.
Kuna na a babaen iti nasao nga addang ket maalay-ayan ti nakaro nga epekto ti panagngato ti presyo ti langis gapu iti mapaspasamak a riribok iti Middle East.
Inlawlawag na a kabayatan ti summer ket adda ti pakabuklan a 70megawatts ti makonkonsumo ditoy probinsya idinto a ti supply a kuryente manipod iti San Miguel ken Aboitiz ket 52megawatts.
Kabayatanna, inbatad met ni Atty. Malasig a gapu iti agtultuloy a panagdur-as ti probinsy ket agkurang ti supply ti kuryente isut gapuna a ti kurangna a 10megawatts ket isu ti sinerrek da a sabali manen a katulagan iti Aboitiz babaen ti Therma Power Inc.
