LAOAG CITY – Saan nga admitiren ti Ilocos Norte Electric Cooperative (INEC) nga iti mismo a sub-station da iti Barangay Payas iti ili ti San Nicolas ti naggapoan ti kuryente a nakatayan dagiti dua a lineman ti nasao a kooperatiba.
Segun kenni General Manager Herbert Agdigos, iti imbestigasyon ti nabukel a Fact Finding Committee ket awan ti naduktalan da no sadinno ti naggapwan ti kuryente a nangpatay kadagiti dua a lineman.
Nupay kasta, inpasingked ti INEC nga ikarigatan da nga ammoen wenno duktalen no sadinno ken kasano a nagtaud ti kuryente a nangpatay kadagiti nasao a biktima.
Inbatad na a naamoan pay ti Fact Finding Committee a saan a sinurot dagiti dua a lineman ken dagiti kakadwa na ti proseso iti pannakaipaay ti seguridad kadakuada kabayatan ti panagtarimaan da.
Kunana nga adda ti sabali a naggapwan ti kuryente.
Maipalagip nga itay napalabas a bulan ket pimmusay dagiti dua a lineman ti INEC bayat nga adda da iti ngato ti poste nga agtartarimaan.
Naamoan nga addan dagiti inisyal a tulong nga inted ti kooperatiba kadagiti dua a biktima.
Kabayatanna, silulukat ti INEC kangrunaan na ti komite iti anyaman nga imbestigasyon nga iyuswat ti sabali a grupo.
Mainaig iti daytoy, inlawlawag ni Engr. Eduardo Suguitan, maysa nga electrical engineer ditoy probinsya ken residente ditoy ciudad ti Laoag a dua laeng ti mabalin a paggapwan ti kuryente a mabalin a nangpatay kadagiti dua a lineman ti INEC.
Segun kenni Suguitan, ti laeng naggapawan ti kuryente ket ti kimat wenno adjacent a live wire ngem mabalin a protehiran daytoy.
Mamati ni Suguitan a saan nga aggapo iti generator ti paggapwan ti kuryente a nangkettel ti biag dagiti biktima.
Innayon na nga awan ti posibilidad na a mikonektar iti linya ti INEC ti kuryente a manipud iti generator.
Kabayatanna, inrakurak ni Mrs. Remelyn Portela, ti asawa ti maysa kadagiti lineman ti INEC a pimmusay kalpasan a nakuryente nga inekspektar dan agkikinnalub dagiti opisyal ti nasao nga kooperatiba.
Segun kenni Portela, saan da a namnamaen nga adda ti agsungbat iti pannakuryente ti asawa na.
Inlawlawag ni Mrs. Portela a mabalin nga idanon da ti nasao a pasamak iti korte tapno mapaneknekan no siasinno ti responsable iti daytoy.
Inbatad na nga inkari ti INEC a kalpasan ti makabulan ket ited da iti pamilya dagiti biktima ti resulta ti pinal nga imbestigasyon da ken awan pay ti napan nakisarita kadakuada.
Mainaig iti daytoy, namnamaen na a dagiti kakadwa ti asawa na ket agsao seknan iti napasamak tapno malawlawagan ti napasamak iti asawa na.
Emosyunal pay ni Mrs. Portela a nagpanawagan kadagiti opisyal ti INEC nga ibaga da ti pudno a napasamak tapno saan dan a mariribukan.
