LAOAG CITY – Inrakurak ti Ilocos Norte Electric Cooperative (INEC) a kalikagom na ti maaddaan ti dakkel a savings isut gapuna a sinerrek ti kooperatiba ti Advanced Metering Infrastructure (AMI) a teknolohiya manipod iti Linmin Company.
Segun ken ni Acting General Manager Cipriano “Perry” Martinez, uray aggastos ti kooperatiba ket dakkel latta ti mainot na a kwarta gapu ta maliklikan ti transmission loss.
Kuna na a 20 a porsiento latta ti transmission loss iti kada bolan no sadinno a no ad-adalen ket umabot iti 200 a bilyon a pisos ti baybayadan ti kooperatiba manipod iti power generator ken 20 a bilyon a pisos ti masaysayang gapu iti transmission loss.
Nupay kasta, inlawlawag ni Martinez a babaen iti nasao a teknolohiya ket maliklikan ti pannakasayang ti kwarta ti kooperatiba.
Malaksid iti daytoy, mamonitor payen ti makonsumo a kuryente dagiti member-consumers, ken no makakonsumo ti 1,500 kilowatt ket addan ti panag-warning na.
Maaramid dagitoy babaen iti maysa nga application a maikonektar iti metro a maited kadagiti member-consumers.
Kabayatanna, agtalek ni Hon. Antonio Mariano Almeda, ti National Electrification Administration (NEA) Administrator a dakkel ti maitulong ti nasao a teknolohiya kadagiti electric cooperatives iti intero a pagilian.
