LAOAG CITY – Maysa a pakaawisan dagiti turista idiay Pakistan ti pannakagun-od ti baro a Guinness World Record gapu ta isu ti kadakkelan nga inflatable castle iti intero a lubong.
Nabiit pay a pinasingkedan ti organisasion ti Guinness World Records a ti Jumbo Jump idiay Karachi, Pakistan ti kaudian a record holder ti titulo a “Largest Inflatable (Bouncy) Castle”. Daytoy ket gapu iti kadakkelna a 15,295.51 a kadapan kuadrado wenno 1,420 a metro kuadrado.
Ti Jumbo Jump ket addaan iti maximum capacity a 200 a tattao ken addaan iti slide, assault course, climbing walls ken photo booth.
Segun iti akinkukua iti Jumbo Jump a ni Safeer Khan, inpasdekna daytoy tapno ad-adu ti pagpasiaran idiay Pakistan.
Innem a bulan ti kasapulan tapno maaramid ti inflatable castle agraman ti panagplano, trabaho ti disenio ken panagpili kadagiti materiales.
Ti panangikabil iti angin wenno panangipapudot iti daytoy ket mangala laeng iti 10 a minuto.
Naammoan a tapno umiso ti pannakarukod ti inflatable castle, nagusar dagiti tattao ti fiberglass survey tape ken laser distance meter.
Mangnamnama ni Khan a ti Jumbo Jump ket mangallukoy kadagiti gangganaet.
