LAOAG CITY – Gimminad ti inflation wenno ti panagngato ti pakabuklan a presio dagiti produkto ken serbisio iti Pilipinas idi bulan ti Hunio.
Inrakurak ni National Statistician ken Philippine Statistics Authority Chief Claire Dennis Mapa, gimminad iti 3.7% ti inflation iti napalabas a bulan, apagapaman daytoy a bimmaba manipud iti 3.9% a nairekord idi Mayo.
Nagresulta daytoy iti year-to-date inflation a 3.5% a simrek iti target range ti gobierno para iti inflation a 2% agingga 4% para iti 2024-2028.
Inbatad ni Usec. Mapa, ti kangrunaan a nakatulong iti ad-adda a panagginad ti inflation iti napalabas a bulan ket ti panagginad ti panagngato ti balor ti housing, danum, kuriente, gas ken dadduma pay a produkto a petrolyo ken transportasion.
Iti baet ti pakabuklan a panagbaba ti inflation rate idi Hunio kalpasan ti 4 a nagsasaruno a nangato nga inflation, kuna ni USec. Mapa a saan a nalawag no agtultuloy iti nabatbati pa a bulan ti 2024 ti nakita a panagginad ti inflation.
Daytoy ket gapu iti naobserbaran a panagngato iti month-on-month inflation iti heavy-weight Food ken Non-Alcoholic Beverages index.
