LAOAG CITY – Agtultuloy ti panangisayangkat ti City Environment and Natural Resources Office ditoy ciudad ti Laoag ti information dissemination campaign mainaig iti solid waste management kadagiti amin a barangay ditoy ciudad.
Segun kenni Mrs. Mylene Pascual, ti mangidadaulo ti City Environment and Natural Resources Office, kasapulan a maipaadal kadagiti umili ti naiget ti panag-segregate ken panagkolektar iti basura kas iti residual waste.
Inbatad na a saan a linged nga ado dagiti umili a naggapo kadagiti nagduduma a lugar nga umay agnaed ditoy ciudad isut gapo na a kasapulan ti information education campaign mainaig iti daytoy masalwadan ti aglawlaw.
Kunana a ti kangrunaan pay a problema ket ti food waste wenno pannakasayang dagiti makan nga isu ti makitkita da a rason it panagbangsit dagiti makolkolektar a basura.
Nupay kasta, inbatad na a babaen iti daytoy a kampanya ket in-inot a bumassit ti basura ditoy ciudad ken mapagtalinaed ti kinapintas ti aglawlaw, kasta met a maikkan ti solusyon ti panangsalaknib iti salun-at.
