LAOAG CITY – Nag-viral iti social media ti maysa nga inhinyero a ni Engr. Joseph Vergara Talub a taga ili ti Badoc a nakaaruat ti P-Pop attire a nagdalus iti classroom ti kabsatna a mangisursuro idiay Cabugao, Ilocos Sur.
Segun kenkuana, saan nga immanay ti aldaw a naikeddeng para iti pannakaisayangkat ti Brigada Eskwela tapno dalusan ken iyurnos ti classroom a pangisuroan ti kabsatna.
Inbatadna nga adu ti kinasapulanda nga iplastar gapu ta naiyakar ti classroom a pangisuroan ti kabsatna.
Inlawlawagna a tunggal Sabado ken Domingo ti panagturongda iti pagadalan tapno madalusan ken maiyurnos dagiti amin a kagamitan iti uneg ti classroom.
Mainaig iti daytoy, inpakaammo ni Engr. Talub a mahilig daytoy nga agaramid ti content nga isu ti i-upload-na iti social media.
Kabayatanna, naammoan a bayat a maisursurat daytoy a damag ket dumanonen iti sumurok 2.2 million views ti nasao a viral video.
