LAOAG CITY – Minulta ti PNP Traffic Division ti inhinyero nga empleyado ti gobyerno ti ciudad ti Laoag a nagilubbon iti motorsiklo iti pada na nga empleyado nga awan ti helmet na bayat a daldalyasaten da ti kaattiddugan ti Rizal St.
Kinumpirmaran daytoy ni Police Chief Master Sergeant Ferdinand Santos, Hepe ti PNP-Traffic Division ditoy ciudad ti Laoag.
Segun ken ni Santos, ti nangiturong iti motorsiklo a nabigbig ti nagan a ni Engr. Aike Luis ti inikkan da ti citation ticket gapu ta inlubbon na ni Alex Jay Campus nga awan ti soot na nga helmet.
Kuna ni Santos a biruken da koma dagiti nasao nga empleyado kalpasan a nagwaras ti ladawan da iti social media ngem dagituyen ti boluntaryo a nagturong iti opisina da.
Inlawlawag na a ti rason no apay nga inlubbon ni Luis ni Campus ket gapu ta idi malabsan na ket agpilaypilay ken asidegen ken malabsan na ti papanan na.
