LAOAG CITY – Inlawlawag ni Engr. Joselito De Vera, Acting Division Manager ti Ilocos Norte Irrigation Management Office a masapol a maminsan iti kada bulan laeng ti panaggatang dagiti benepisiario iti nalaklaka a presio ti bagas.
Segun kenkuana, daytoy ket tapno maiwaras met laeng iti naruay nga umili ti pannakairubuat ti Bagong Bayaning Magsasaka Rice babaen iti Kadiwa ng Pangulo ditoy probinsia.
Inbatadna a ti laeng rehion uno ti adda ti contract farming-na a dakkel a tulong daytoy para kadagiti mannalon.
Kunana a nangipaayda ti farm inputs nga agbalor iti 30 a ribu a pisos idinto nga addanto pay ti 20 a ribu nga ipaayda kadagiti mannalon para iti post harvest dagitoy.
Inlawlawagna a ti lima a tonelada a maapit dagiti mannalon ket bayadan ti National Irrigation Administration ti 50 a ribu a pisos ngem no nababbaba ti maapitda kas ti 4 a tonelada ket 40 a ribu a pisos ti ited ti ahensia.
Mainaig iti daytoy, kuna ni De Vera a manarimaan ti pannakikoordinarna kadagiti mannalon para iti maiyuswat a contract farming.
Kabayatanna, inpakaammo ni Ms. Rhoda Galban, Chief of AgriBusiness Marketing Assistance Division a kalikagum ni Pres. Ferdinand Bongbong Marcos Jr. a maipababa pay ti presio ti bagas a mailaklako kadagiti merkado publiko isu a nairubuat daytoy a programa iti intero a pagilian.
Kunana a ti bagas a mailaklako iti 29 a pisos iti kada kilo ket nairanta pay laeng para kadagiti vulnerable sector.
Inpasiguradona a nupay nalaka daytoy ket nangato met ti kalidadna ken gagem ti gobierno a maidanon daytoy kadagiti maseknan nga umili nga abot-kaya iti bulsada.
