LAOAG CITY – Naan-anayen a nakasagana ti Philippine National Police a mangsalwad kadagiti botante a Pilipino, opisyales ti Commission on Elections, mangisursuro nga agserbi kadagiti presinto, ken dagiti grupo ti civil society a katulungan ti gobyerno tapno masigurado ti nadalos, natalna ken napudno a midterm elections intono Mayo 12, 2025.
Iti maysa nga statement, inrakurak ni Philippine National Police Chief Police General Rommel Francisco D. Marbil a nakasagana dagiti kameng ti pulisya a mangusar kadagiti resources da tapno masigurado a dagiti Pilipino ket makabotos nga awan ti panagbuteng da kangrunaan na kadagiti lugar a naideklarar kas hotspot areas.
Inbatad ni Marbil a daytoy nga inisyatiba ket paset iti direktiba ni Presidente Ferdinand “Bongbong” Marcos Jr. a siguradwen ti natalna a midterm elections, kangrunaan na iti Bangsamoro Autonomous Region in Muslim Mindanao, nga iti pakasaritaan ket nakapasar ti kinadamsak nga adda ti pakainaigan iti eleksyon.
Immunan nga inestablisar ti Department of the Interior and Local Government ti saan a nababbaba ngem 34 election hotspots iti intero a pagilian, no sadinno a 27 ditoy ket masarakan iti BARMM.
Mainaig iti daytoy, inpakaammo ni Marbil nga adda ti 6,327 checkpoints a naestablisar iti intero a pagilian kas paset ti panangipatungpal ti gun ban para iti panagsagsagana iti eleksyon.
